ბლოელ გოგიას ხის კოტეჯს სასაზღვრო პოლიცია უშენებს. შინაგან საქმეთა სამინისტრომ კოტეჯის მშენებლობის დამადასტურებელი ვიდეომასალა 27 ნოემბერს გამოაქვეყნა.

ბლოს ერთადერთი მკვიდრის გოგია გიგაურის შესახებ პირველი რეპორტაჟი 2019 წლის მაისში „მთის ამბებმა“ გამოაქვეყნა. რამდენიმე წლის წინ, ძველი ხევსურული სახლი ზვავმა დაუნგრია. ბლომდე სამანქანო გზა არ არის, არც არასდროს ყოფილა. გოგია მეოთხე წელია კარავში ცხოვრობს.

ბლოელი გოგიასთვის ხის სახლის ასაშენებლად „მთის ამბებმა“ მაისშივე დაიწყო კამპანია და 9 ათას ლარზე მეტი შეაგროვა. შემოწირულება 400-ზე მეტმა ადამიანმა გაიღო. კომპანიაც შერჩეული იყო, რომელიც 11 ათას ლარად, გოგიასთვის ბლოში 20 კვმ-ის ხის სახლს ხუთ დღეში ააშენებდა, მაგრამ შინაგან საქმეთა სამინისტრომ ბოლო ეტაპზე უარი თქვა ბარისახოდან ბლოში, სასაზღვრო პოლიციის ვერტმფრენით ხის სამშენებლო მასალების გადატანაზე. ამ სტატიას მწვავე კრიტიკა მოჰყვა სოციალურ ქსელებში შსს-ს და მთავრობის მიმართ.

ტელეკომპანია „იმედმა“ 24 ნოემბერს გაავრცელა ინფორმაცია, რომ შინაგან საქმეთა სამინისტრომ ბლოელ გოგიას სიურპრიზი გაუკეთა და ამ ზამთარს თბილ სახლში გაატარებს.

შსს-მ ბლოელი გოგიასთვის კოტეჯის აშენება მას შემდეგ გადაწყვიტა, რაც ვერტმფრენით დახმარებაზე უარის თქმის შესახებ „მთის ამბებმა“ კრიტიკული სტატია გამოაქვეყნა და „მთავარმა არხმა“ ბლოელ გოგიაზე სიუჟეტი გადაიღო.