6580 
გიორგი კვირიკაშვილმა პროფესიული დღესასწაული დიკლოში, N7 სასაზღვრო სექტორის თანამშრომლებს მიულოცა: „თქვენ დგახართ ჩვენი სახელმწიფოს უსაფრთხოების სადარაჯოზე და საქართველოს მიწა-წყალს იცავთ. არ არსებობს ამაზე საპატიო მისია, ვიდრე ემსახურო შენს ქვეყანას. თქვენ ხართ ჩვენი ქვეყნის ერთგული გუშაგები. საქართველოს სახელით, მადლობას გიხდით სამშობლოს სამსახურისთვის, ჩვენი სიმშვიდისთვის. გისურვებთ დღეგრძელობას, საქართველოს გაძლიერებას, თქვენი ოჯახების კეთილდღეობას,“ - განაცხადა პრემიერმა მესაზღვრეებთან შეხვედრისას.
დღესვე გიორგი კვირიკაშვილი ადგილობრივ მოსახლეობასაც შეხვდა და მათ პრობლემების მოგვარებას დაპირდა. პრემიერ-მინისტრის განცხადებით, იწყება თუშეთის გზის მშენებლობა, რაც ძალიან მნიშვნელოვანია მთა-თუშეთის განვითარებისთვის: „გზას ვიწყებთ უკვე. პანკისის ხეობიდან ამოვიყვანთ უფრო კარგ გზას, რომელიც 12 თვე იმუშავებს და მუდმივად იქნება კომუნიკაცია. ეს არის ძალიან მნიშვნელოვანი. გვინდა, რომ თქვენი პირობები მაქსიმალურად გავაუმჯობესოთ,“ - აღნიშნა კვირიკაშვილმა მოსახლეობასთან შეხვედრისას.
მისივე განცხადებით, წელს თუშეთში დაგეგმილია მთელი რიგი სამუშაოები კულტურული მემკვიდრეობის ძეგლების დასაცავად, წყალმომარაგების სისტემის მშენებლობა და ნაგავსაყრელის კეთილმოწყობა.
